Aids Does Matter
Deliza Maye Fernandez

                   Ang ikatlong State-of-the-Nation Address ni Pangulong Benigno Aquino III kamakailan lang ay umani ng papuri sa mga Pilipino at sinasabing ito na raw ang pinakamagandang SONA ng pangulo. 

              Walo sa sampung taong aking nakapanayam ay nagustuhan ang kanyang SONA. Marami sa kanila ang nagbigay importansiya sa bahaging pangkalusugan na ipinahayag ni PNoy. Matatandaang ibinida ng pangulo ang pagtaas ng bilang ng nakaenroll ngayon sa PhilHealth. Mula sa 62% noong dating administrasyon, umakyat ito sa 85% sa kanyang pamamahala. 5.2 Milyon dito ang nakikinabang na sa No Balance Billing policy ng Department of Health. Sinabi pa niyang ang lunas sa mga sakit tulad ng Asthma, Pneumonia, Katarata, at maging ang iba pang Catastrophic diseases tulad ng breast cancer, Prostate Cancer, at Acute Leukemia ay makukuha ng libre ng mga pinakamahirap na Pilipino. Magandang balita rin ang tungkol sa pagtaas ng bilang ng mga nurses na naipapaabot sa mga bayan na mistulang napag-iwanan na ng pag-unlad. Saklaw ito ng Pantawid Pamilya.

                 Wala akong nakikitang masamang hatid sa pahayag ng Pangulo. Ang sa akin lang ay mas magiging ayos sana kung nabanggit din niya ang isyu tungkol sa Human Immunodeficiency Virus (HIV) na maaaring maging AIDS o Acquired Immunodeficiency Syndrome. Matatandaang lumobo ang may kaso ng HIV sa bansa simula ng bagong milenyo at patuloy pang lumulobo. Ayon sa Philippine National Aids Council, 9,669 na ang kumpirmadong may ganitong kaso sa bansa, maliit na bilang kung tutuusin sa 100Milyong tao sa Pilipinas. Pero hindi pa kabilang dito ang ilang mga taong may mga sintomas at hindi pa umaaming mayroon sila nito. 

                Ayon naman sa United Nation’s Department Program, Sampung impeksyon ang nadedetect kada araw. Tatlong beses sa naitala noong mga nakaraang taon. Ito ay nakakaalarma bilang ang Pilipinas ay isa sa pitong bansa sa mundo kung saan ang HIV ay mabilis na dumarami ng 25%. Malaking porsyento ang sinasabing dulot daw ng men-to-men sex. Marami ang nagsasabing dahil daw ito sa kakulangan ng kaalaman ukol dito at maging ang simbahang katoliko ay tampulan ng sisi ukol dito sa pagbabawal gumamit ng mga contraceptives.

                     Bagama’t pinaglalaban ni PNoy ang RH Bill, naniniwala akong mas pinag-uukulan niya rito ang pagpigil sa pagdami ng populasyon sa bansa. Naging matunog na ito noong nakaraang mga buwan. Gusto ko sanang malaman kung anong plano ng pamahalaan ukol sa nakakaalarmang virus na ito na hanggang ngayon ay hindi pa matukoy ang solusyon para dito. Sana’y katulad din ito ng kaso ng Dengue sa Bukidnon na mula sa 1,216 kaso ay bumaba na lang ito sa 37 dahil sa mosquito trap.  




Leave a Reply.